Лорен Санчез, свршеницата на Џеф Безос, учествуваше во историската женска мисија на „Блу Ориџин“ во понеделник.
Покрај Санчез, во вселената патувале и пејачката Кети Пери, новинарката Гејл Кинг, поранешната ракетна научничка на НАСА, Ајша Боу, продуцентката Керијан Флин и научничката Аманда Нан.
Познати личности како што е моделот Емили Ратајковски, како и корисниците на социјалните мрежи, ја критикуваа мисијата, нарекувајќи го патувањето „бесрамно его патување за елитата“.
Членовите на екипажот одговорија на овие критики.
Санчез за списанието „Пипл“ изјави дека е „навистина лута“ поради секоја негативност насочена кон оваа мисија.
„Би сакала да дојдат во Блу Ориџин и да ги видат илјадниците вработени кои не само што работат тука, туку и го вложуваат своето срце и душа во ова. Тие ја сакаат својата работа и својата мисија, а тоа им значи многу. Затоа, кога слушам вакви коментари, велам: „Верувај ми. Дојди со мене. Ќе ти покажам за што се работи и ќе биде откровение за тебе“, рече таа.
Новинарката Гејл Кинг, исто така, се осврна на критиките.
„Секој што ја критикува мисијата навистина не разбира што се случило овде“, рече Кинг, осврнувајќи се на „реакциите од млади жени“ што ги доби тимот и зборувајќи за тоа што тоа значи за девојките ширум светот.
За време на прес-конференцијата, Боу, поранешна ракетна научничка во НАСА, се присети на еден момент од нејзините средношколски денови кога се обиделе да ја одвратат од кариера во воздухопловното инженерство.
„Кога решив да се занимавам со воздухопловно инженерство, тоа беше откако мојот советник во средно училиште ми рече дека треба да студирам козметологија бидејќи не мислеше дека сум соодветна за оваа област. Завршив два магистерски студии по воздухопловно инженерство, работев за НАСА и сега можам да седнам на сцена и да кажам дека овој успех ги надминува сите критики“, рече таа.
Пред патувањето, Кети Пери зборуваше за тоа како ја гледала можноста да оди во вселената со екипаж составен само од жени како шанса да „инспирира нови генерации“, вклучувајќи ја и нејзината ќерка Дејзи.
„Дека никогаш нема да имаат ограничувања за своите соништа и дека ние им покажуваме како секој човек може да ги оствари своите соништа, без оглед на потеклото, етничката припадност, економската состојба или нивото на образование“, рече таа.
